सोट्टाका डुबका अहा कति मिठा छाँछ बकली होइबरे,
तितौडा, सोट्टा, गहत, मुसुरको दाल छाँछ चूक हालिबरे ।
धनियाँ, दाडिम, आमकी चटनी लै दालभातसित होइबरे,
फाइवस्टार होटल नाँ गरन्याँ खानाइ सब खाइबरे ।।
घोगा गौंका रोटा फुल्क्या पन्याँ सय्या छाँछीबटुक खीर लै,
माणा झुनझुन्याँ पुरी बटुक सेल राइतो घिऊ दूध दै ।
नेथीको पलेउ माण कोइरालोः भुट्याकी छाँछ पाइया,
मोटो चावल लै बडो मिठो हुन्याँ थपी थपी आइन्थ्याँ ।।
अम्बा, आम, अनाँर, मिणा चिउराका केला, आरु सुन्तला,
स्याउ, नास्पाती, मौसमी, वनका ऐँस्याल लै किर्मडी ।
लौकी तोरिया सिमी आलु कदु पिणौं भिण्डी करेला चोतो,
रायो चन्सुर पालङो बेथु गोभी खुर्सानी हरियो तोडो ।।
मानव जीवनलाइ स्वाद पौष्टिक दिन्याँ अनेक बस्तु छन्,
प्रकृतिले उपहार यो सरलता पुर्याइ दिइन् ।
सौगात यो सब उपलब्ध होइबरे लै जिबडाको थप स्वादको,
आफुइ झाः पशुपन्छि प्राणी हत्त्या गरनु महापाप हो ।।
(आत्मराम ओझा स्मृति ग्रन्थबाट)
